Цаг үетэй холбоотой, хурц сэдвийг хөндсөн, сэтгэл сэртхийлгэмээр дүр зургийг хальсанд буулгах, ид дэвэрч буй асуудлын талаар бичих нь тийм ч хэцүү биш. Харин бүх талаараа хайр, хүний эерэг сайхан талуудыг харуулсан, зураг авч, тийм нийтлэл бичих л хэцүү байдаг. Хүн өөрөө хайрын бүтээл боловч муу зүйлд татагдахдаа амархан байдаг учраас тэр биз ээ. Тэгвэл бид та бүхэнд, энэ дэлхий дээр дайн дажин, улс төрийн асуудлууд, том уулзалт, төрийн эргэлтээс гадна амьдралын зорилго болсон баяр хөөр, хайраар бялхсан мөчүүд байдаг гэдгийг сануулах гэсэн юм. Ямар ч үед хүн хэвээрээ үлдэх нь л хамгийн чухал зүйл билээ. Гэтэл хөл толгой нь мэдэгдэхгүй өрнөх энэ амьдрал дунд хамгийн чухал тэр зүйлийг олж харж, хадгалаж үлдэх л хамгийн хэцүү бас хамгийн чухал. Тиймээс хайрыг хайрлаж, байгаа бүхнээ гамнаж яваарай гээд, сайхан мөчүүдийн фото цуглуулгыг таны өмнө дэлгэж байна.