Ноэль Круз – хүүхэлдэйг алдартан болгон амилуулагч

Ноэль Круз (Noel Cruz ) бол олон улсад хамгийн нэрд гарсан репейнт мастеруудын нэг. Репейнт – бэлэн болсон хүүхэлдэйнүүдийн нүүрний будгийг арилгаж байгаад, шинээр будах ажлыг хэлнэ. Дуурайлгаж байгаа хүнийхээ нүүрний төрхтэй тухайн хүүхэлдэйг усны дусал мэт ижилхэн, бас маш амьд болгож чаддагт түүний гайхамшиг оршино. Ноэль нь Barbie, Gene, Sybarite, Tyler, Sydney, Роберт Тоннер болон Франклин Минт-ын гэх зэрэг хүүхэлдэйн үйлдвэрлэгчдийн бүтээлүүд дээр ажилладаг байна.

Филлипиний зураач Ноэль Крузын хүүхэд нас тарчиг амьдрал дунд өнгөрчээ. Ар гэрээ тэжээхийн тулд хүүхэд байхаасаа цэвэрлэгчээр ажиллахынхаа хажуугаар зав л гарвал зураг зурдаг байжээ. Ингээд ямар ч тусгай сургууль, курсэд хамрагдаагүй тэрээр 16 насандаа л хүний хөрөг зураг захиалгаар зурдаг болсон байна. Хэдэн жилийн дараа алдартай хөрөг зураач, бас хүүхэлдэйний репейнтер болжээ.

Түүний бүтээлүүд маш их алдартай бөгөөд зөвхөн интернэт дуудлага худалдаагаар л зарагддаг байна. Үнэ нь 500–3500 долларын хооронд хэлбэлздэг. Гэхдээ Анжелина Жоли-гийн төрхтэй хүүхэлдэй нь дуудлага худалдаагаар 4300 доллараар зарагдсан байна. Ноэлийн хүүхэлдэйнүүд нь олон улсын зураачид, урлагийн бүтээл цуглуулагчдын дунд өндрөөр үнэлэгддэг. Тиймээс Дэлхийн өнцөг булан бүр дэхь урлагт хайртай баячуудын хувийн цуглуулгад Ноэлийн бүтээлүүд олон байдаг аж.

Ноэлийн хамгийн их зурах дуртай алдартнууд нь Анжелина Жоли, Жонни Депп, Элизабет Тейлор, Вивьен Ли нар юм. Тэднээс тэрээр урам зориг, онгодоо олж авдаг ажээ. Түүнчлэн Ноэлийн бүтээлүүд дунд “Харри Поттер”, “Бөгжний эзэн”, “Твайлайт”, “Цус сорогчийн өдрийн тэмдэглэл”, “Карибын тэнгисийн дээрэмчид” зэрэг киноны жүжигчдийг дуурайлгасан хүүхэлдэйнүүдийг олж харж болно.