1
Араан дээр гараа тавьж явах
Араагаа солих гээгүй л бол араан дээр гараа тавих шаардлагагүй. Байнга ингэж явах нь дамжуургад ачаалал өгч, яваандаа араа нь холхидог болж араагаа солиход хүндрэлтэй болгодог. Ер нь араагаа солих шаардлагатай үедээ л сольж бусад үед хоёр гараараа жолоогоо барьж явах нь хамгийн зөв.
2
Зогсоолын тоормосыг ашиглахгүй байх
Машин яваагүй зогсож байх үед зогсоолын тоормос машиныг хөдөлгөхгүй барьж байх үүрэгтэй байдаг. Харин карданаа татаагүй байх үед машины нийт жинг энгийн тоормосны жижиг оньс төхөөрөмж барьдаг байна. Хэрвээ энэ байдал удаан үргэлжилбэл энгийн тоормос аажимдаа элэгдэж улмаар энгийн тоормос буюу “Р” араа ажиллагаагүй болно.
3
Ачаагаа хэтрүүлэх
“Энгийн, хөнгөн байлга” гэсэн уриа нь бүх машинд хамаарна. Тэглээ гээд дуу намсгагчаа эсвэл хойд суудлаа шууд авч хая гэсэн үг биш харин шаардлагагүй ачааг байнга байлгах хэрэггүй. Жин нэмэгдэхийн хэрээр шатахуун их зарцуулагдахаас гадна тормоз, удирдлагын систем зэрэгт нөлөөлдөг. Одоо нэг машины салон, ачаагаа цэвэрлэж зөвхөн зайлшгүй шаардлагатай зүйлсээ үлдээх цаг болсон байх аа.
4
Байнга бага шатахуунтай явах
Яахав зарим тохиолдолд шатахуунаа дүүргэх эдийн засгийн боломжгүй байж болно. Ийм үед хүмүүс хэдхэн литр шатахуун хийгээд яваад байдаг. Гэвч энэ байдал удаан давтагдвал ирээдүйд бүр их зардал гарна гэдгийг жолооч нар тэр бүр мэддэггүй. Орчин үеийн шатахууны насос нь шатахуунд бүрэн далдарсан үедээ халдаггүй, харин бага шатахуунтай үед халж, байгаа багахан хэмжээний бензинээ илүү хурдан зарцуулдаг. Ядаж дөрөвний нэгээс нь буулгахгүй байвал энэ эрсдэлээс тодорхой хэмжээгээр сэргийлж чадна.
5
Огцом тормозлох
Энийг бол захын хүүхэд ч мэднэ дээ. Огцом, байн байн тормозлох нь хөгжилтэй байж болох ч ингэснээр хамаагүй их шатахуун зарцуулагддаг. Мэдээж огцом тормозлох шаардлагатай үе гарч болно. Гэхдээ олон давтагдвал тормозны наклад элэгдэнэ. Эртхэн тооцоолоод зөөлнөөр тормозлоод явах нь чухал.
6
Хүйтэнд хөдөлгүүрээ нормалдах
Хүйтэнд хөдөлгүүрээ асаалттай ганц хоёр минут л орхиж болно. Ингэснээр түргэн халж, тос эргэлтэд орох хэсэг хугацааг олгож байгаа юм. Гэхдээ та аль болохоор үүнээс удаан асаалттай орхихоос зайлсхийх хэрэгтэй. Яагаад гэвэл хүйтэнд хөдөлгүүрээ удаан асаалттай байлгаснаар дотоод температур маш хурдан солигдож, цаашлаад дотоод эд ангийг гэмтээдэг байна. Үүнээс гадна тосны эргэлтэд орж амжаагүй шаардлагагүй хэсгүүд ачаалахад хүргэдэг. Угаасаа өөрөө халаад эхлэхээрээ хөдөлгүүрийн дуу багасаад ирнэ.
7
Консон дээрээ байнга гишгэх
Механик тэрэг барьдаг зарим жолоочид гэрлэн дохион дээр зогсож байхдаа гэрэл солигдонгуут шууд явна гээд консон дээрээ дарсан чигээрээ хүлээгээд байдаг. Консоо удаан барих тусам диск, холхивч, арааг гэмтээж байдаг. Үүнээс гадна гадаргуу нь хоорондоо үрэгдэж, машин гэнэт унтрах аюултай.
8
Бүрэн зогсоогүй байхдаа араагаа солих
Зогсоол дээр бага зайд багтаж орохын тулд машин бүрэн зогсоогүй үед R-ээс D-рүү шилжүүлэх нь элбэг байдаг. Ямар ч тохиолдолд үүнээс зайлсхийх хэрэгтэй. Олон удаа ингэснээр хөтлөгчид ачаалал өгөх эрсдэлтэй.
9
Уруудахдаа тормозоо гишгэх
Огцом уруудаж буй тохиолдолд жолоочид бэлэн байхын тулд тормозоо зөөлөн гишгэсэн хэвээр урууддаг. Энэ нь ачааллыг ихэсгэж, тормозны системд халаалт үүсгэж, ротор зэрэг эд ангийг гэмтээдэг. Оронд нь уруудаж байгаа үедээ хүнд араандаа хийх хэрэгтэй. Ингэснээр хөдөлгүүрийн өөрөө тормозны үүрэг гүйцэтгэнэ гэсэн үг.
10
Хянах самбарыг тоохгүй байх
Хянах самбар дээрх жижиг дүрснүүд, янз бүрийн жижиг сажиг чимээ зэргийг тоохгүй яваад байвал яваад л байна. Гэвч эдгээр нь машины чинь ямар нэгэн юм салж унах гэж байна эсвэл бүр эвдрэх гэж байна шүү гэсэн дохио юм. Юунаас болж дуу гараад байгааг хайж олохоо битгий хойшлуулаарай. Тэгэхгүй бол бүр ч муу зүйл болж магадгүй шүү. Иймд ямар нэг чимээ гарах эсвэл хянах самбар дээр тэмдэглэгээ гарч ирмэгц шууд оношлуулаарай.
