Японы тэрхүү шинээр илэрсэн ордын нөөцийг 16 сая тонн гэж тухайн оны дөрөвдүгээр сард зарлаж байв. Тийм их хэмжээний нөөц нь дэлхийн хэрэгцээг бараг хязгааргүйгээр хангаж чадна гэж эрдэмтэд судалгааны ажилдаа өгүүлсэн байна. Тодруулбал ордод агуулагдах иттригийн нөөц дэлхийн хэрэгцээг 780 жил, диспрозигийн нөөц 730 жил, европигийн нөөц 620 жил, тербигийн нөөц 420 жилийн турш хангаж чадах ажээ.

Байрлалын хувьд тус орд нь Токиогоос зүүн өмнө зүгт 1850 километрт Минамитори арлын ойрхон оршдог байна. Тэндхийн далайн бүс нь Японы эдийн засгийн онцгой бүс гэж тооцогддог учир тус ордыг дангаараа эзэмших эрх Япончуудад байгаа ажээ. 

Газрын ховор элементүүдийн нийлүүлэлтийг одоогоор Хятад улс бараг ганцаараа хангадаг. 2014 онд Япон, Хятадын хооронд Номхон далайн алслагдмал арлуудыг хэн нь эзэмших талаар маргаан дэгдсэний дараа өмнөд хөршийнхөн ховор элементүүдээ Япон руу гаргахаа зогсоож байв. Үүний дараачаас Япончууд өөрсдийн нутгаасаа газрын ховор элементийн нөөц олохоор хайгуул хийж эхэлсэн аж.

Япончуудын хувьд шинээр нээгдсэн эрдэсийн сангаараа дэлхийн зах зээлийг эргүүлэхэд ганц зүйл саад болж байгаа нь олборлох ажиллагаа юм байна. Тус ордын төсөл дээрх судлаачдын багийг ахлаж байгаа эрдэмтэн Ютаро Такаяагийн өгүүлснээр газрын ховор элементийг олборлох процесс нь асар үнэтэй, тиймээс илүү хямдхан аргыг олох судалгаа шинжилгээний ажил зайлшгүй хэрэгтэй байгаа ажээ.