Microsoft компаниас жил бүр зохиодог "The Financial Modeling World Cup" нь нийт 20 мянган ам.долларын шагналын сантай. 

Африк, Ази/Номхон далай, Европ, Хойд Америк, Өмнөд/Латин Америк гэсэн 4 бүсээс шалгарсан 128 оролцогч жил бүр аваргын төлөө өрсөлддөг аж.

Энэ жилийн хувьд шалгаруулалт 11-р сарын 13-нд эхэлж дээр дурдсан 128 оролцогчийг тодруулсан байна. Тэд өнгөрсөн хугацаанд нийтдээ 11 үеийг давсаны эцэст энэхүү амралтын өдрүүдэд шувтаргын тоглолт явагдаж, аваргуудыг тодруулах аж.

FMWC-ийн дүрмийн дагуу өрсөлдөгчид үе бүр дээр нэгээс таван хуудас хүртэлх хэмжээтэй бодлогууд авдаг байна. Ихэвчлэн практик дээр тулгуурласан байдаг тэдгээр бодлогууд нь илүү төвөгтэй байх тусам тоглогчид илүү өндөр оноо авдаг. 

Оролцогчид асуулт бүрийн хариултыг тодорхойлохын тулд Excel програм дээр санхүүгийн загварчлал гаргах хэрэгтэй болдог. Хэн хамгийн үр дүнтэй томъёо, загвар гаргаж ирнэ тэр хүн хамгийн өндөр оноо авна.

Энэ бүхэн танд уйтгартай мэт санагдаж байж болно. Гэвч үнэн хэрэгтээ та Excel-ийн тэмцээнийг яг ойлгоод үзэх юм бол үнэхээр өрсөлдөөнтэй байж чаддаг аж. Тиймээс энгийн тэмцээн шиг FMWC-ийг тусгай хөтлөгч нар шууд тайлбартайгаар дамжуулдаг аж. Тиймээс ердийн спорт шиг тоглогч нар ямар аргыг яаж хэрэглэж байгааг үзэнгээ оноо нь хэрхэн нэмэгдэж байгааг нь харах нь олон хүний сонирхолыг татдаг байна.

Хэрэв та FMWC--ийн бодлогуудыг бодож, өөрийгөө сорихыг хүсч байвал fmworldcup.com хэмээх албан ёсны сайтаас нь татаж авах боломжтой. Хүсвэл үүнийг ашиглан ирэх жилийн тэмцээнд оролцох бэлтгэлээ хангаж ч болно.