"Зэрлэг байгалийн дэргэд..." - Африк тивийнхний нууцлаг амьдралыг харуулсан гайхалтай гэрэл зургууд

Өмнөд Африкийн гэрэл зурагчин Петер Хюго (Peter Hugo) төрж өссөн нутгийнхаа соёл, ард иргэдийн онцлог, нийгэм болоод байгаль орчинд нь тулгамдаад буй асуудлууд зэрэг олон чухал сэдвийг хүмүүст хүргэхийг эрхэмлэдэг байна. Тэрээр бүтээлүүдээрээ дамжуулан Африк дахь гадуурхагдсан бүлгийнхнийг судалж, дэлхий нийтэд дэлгэн харуулдаг гэдгээрээ алдартай. Товчхондоо дэлхийн нөгөө талд амьдрал хэрхэн өрнөдөг болохыг түүний бүтээлүүд тод томруунаар харуулах аж.

Петер Хюго Өмнөд Африкийн Йоханнесбург хотод төрсөн бөгөөд өдгөө 44 настай гэрэл зурагчин юм. Африкийн цагаан арьстан тэрээр өөрийн зургуудаар Африк дахь гадуурхагдсан бүлгийнхнийг судалдаг гэдгээрээ алдартай.

Хюго Африкийн альбиночууд, хараагүйчүүд, ДОХ-той хүмүүс, ахмад настнууд болон Гана улсын зөгийн бал цуглуулагчид, хогийн цэгийн ажилчид, Нигерийн кино урлагийн салбарын Нолливуд гэгддэг жүжигчид, 1994 оны Руандагийн аймшигт хядлагаас амьд үлдсэн хүүхдүүд гэхчлэн сонирхолтой хүмүүсийн гэрэл зургийг буулгахад амьдралынхаа бараг 20 жилийн зориулжээ.

20-иод насандаа сэтгүүлч болохоор ажлын гараагаа эхлүүлсэн тэрээр гэрэл зургийн ертөнцөд татагдах болж, удалгүй энэ салбар луу бүр мөсөн урван орсон гэнэ. Зураг дарж эхлэхдээ Хюго дэлхий ертөнцтэй холбоо тогтоох хүслээс өөр тодорхой зорилгогүй байсан боловч хүн бүрийн дотор "ертөнц" оршиж байгааг ухаарсан цагаасаа хөрөг зураг авч эхэлсэн байна.

Африк тивийн янз бүрийн иргэдийг харуулах гэрэл зургуудыг Руанда, Нигери, Гана болон Өмнөд Африкт авчээ. Энэхүү нийтлэлд түүний "Looking Aside", "Төрөл төрөгсөд", "Үүрдийн алдаа", "The Hyena and Other Men", "Зэрлэг зөгийн бал цуглуулагчид", "Messina / Musina" зэрэг цомгуудын хамгийн алдартай гэрэл зургуудыг багтаав.