Хэдэн жилийн өмнө Америкийн нэгэн иргэн хашаан дотроо доорх хачирхалтай туулайг харсан бөгөөд интернетэд хуваалцсан зураг нь багагүй шуугиан тарьсан юм. "Франкенштейн туулай" гэх хочтой болсон уг амьтныг харсан хэн ч айдаггүй юм аа гэхэд эвгүйрхэж, эртний домог ярианууд санаанд орох нь лав. Зургаас харахад уг туулай яах аргагүй эвэр, сахалтай мэт харагдана.

Уг аймшигт амьтан нь үнэндээ хүнд зэргийн папиллома вирусын халдвартай туулай байжээ. 

"Shope papilloma virus" гэх албан ёсны нэртэй өвчин нь голчлон мэрэгчдэд халдварладаг бөгөөд яваандаа эдийг кератин болгон үхжүүлж, эвэр хэлбэрийн ургацаг үүсгэдэг байна. Өвчин нь хүндэрсэн амьтанд тэдгээр "эвэр" нь хооллоход саад болж, улмаар өлбөрч үхэхэд хүргэдэг аж.

Өрнийн орнуудад тархсан "jackalope" хэмээх мангас туулайн домог нь үнэндээ хүмүүс дээрх халдварыг авсан туулайг харснаас болж үүссэнийг судлаачид баталдаг. 

Магадгүй бидний хэрэглэдэг "Эвэртэй туулай үзсэн юм шиг" гэх хэлц ч үүнээс үүссэн байх боломжтой юм.