Шүд унах үед хамгийн түрүүнд тулгардаг таагүй асуудал бол хэл ярианд өөрчлөлт орох. Таны хэл яриа бусдад ойлгомжгүй болж, шүгэлдэх мэт чимээ гарч болно. Харин дараагийн таагүй зүйл бол ялангуяа араа, хажуу талын шүд байхгүй үед тохиолдох бөгөөд энэ нь хоол хүнсийг зажлахад сөргөөр нөлөөлнө. Энэ тохиолдолд хүн тогтмол хацар болон хэлээ хазах ба энэ нь жижиг бэртэлд хүргэдэг байна. Үүнээс гадна амны хөндийн ноцтой асуудал үүсэх магадлалтай. Учир нь хазалтын хэмжээ 90,7 кг жингээр дарсантай тэнцэнэ. Энэ төрлийн бэртэл нь амны хөндийн үрэвсэл үүсгэх аюултай.

Үүнээс гадна шүднүүд хоосон зайгаа нөхөхийн тулд хөдөлгөөнд орж эрүүний ясны гажуудал үүсгэдэг. Мөн хацар унжих, хонхойх, ам болон хамрын ойролцоо үрчлээтэх болон нүүрний хэлбэр тэгш бус болдог. Анагаах ухааны үүднээс үзэхэд энэ нь хазалтанд сөргөөр нөлөөлж, хазалт өөрчлөгдөхөд хүргэдэг байна. Хэдий чинээ удаан шүдгүй явна төдий чинээ өөрчлөлт их явагдах болно. Учир нь шүдгүй байгаа хэсгийн эрүүний яс нь элэгдэж, чанартай шүдний имплант хийхэд төвөгтэй бас үнэтэй болдог юм.  

Мөн шүдгүй байх нь ходоод гэдсэнд сөргөөр нөлөөлнө. Нэг шүд байхгүй байхад л зажилах үйл явцад алдаа гарч, ходоодонд нэмэлт ачаалал өгдөг. Мэдээж, сэтгэл зүйн хувьд асуудалтай болдог бөгөөд шүдгүй хүн өөрийн дутагдлыг нуухын тулд инээхээ больж, өөртөө итгэх итгэлгүй болдог. Энэ нь ганцаардмал, нууцлагдмал болоход нөлөөлнө.

Асуудлыг хэрхэн шийдвэрлэх вэ?

Ерөнхийдөө унасан шүдийг нөхөхөд хамгийн тохиромжтой, найдвартай арга нь имплант юм. Нэг шүд унасан бол голонцортой шүд хийж болно. Харин хэд хэдэн шүд унасан бол гүүрэлсэн шүд хийх боломжтой. Энэ төрлийн шүд нь хэд хэдэн шүдийг гүүр хэлбэрээр холбох явдал юм. Үр дүн боломжийн бөгөөд үнийн хувьд имплантаас хямд тусна. Хэрвээ бараг шүдгүй үлдсэн бол протез хийсэн нь хамгийн тохиромжтой  хэмээн мэргэжлийн эмч нар зөвлөж байна.