Үнэр нь хүний оюун санаанд хадгалагдан үлдэх тохиолдол байдаг
Отоларингологийн чиглэлээр дэлхийд тэргүүлэгч нэгэн сэтгүүл дээр фантозма үзэгдлийн тухай Америкийн их сургуулиуд болон эрдэм шинжилгээний хүрээлэнгийн шинжээчдийн хамтран явуулсан судалгааны үр дүнг нийтэлжээ. Тэдний үзсэнээр ямар нэг хий хоосон үнэр гэнэт үнэртэх үзэгдэл бодитоор оршдог бөгөөд энэхүү үзэгдэл нь хүн бүрд тохиолдохгүй ч зарим төрлийн хүмүүст бараг өдөр бүр мэдрэгддэг байна.
Судалгааны явц
"Үндэсний Эрүүл Мэнд, Хүн Амын Үйлчилгээний Хөтөлбөр" (NIDCD) -ийн Эпидемиологи, Биостатистик хариуцсан мэргэжилтэн, доктор Кэтлин Бейнбриджээр ахлуулсан судалгааны багийнхан 2011-2014 оны хооронд 40-өөс дээш насны 7000 хүнийг судалгаанд хамруулан, тэдгээрийн амьдралын хэв маяг, дадал зуршил, эрүүл мэндийн байдалд дүн шинжилгээ хийжээ. Судалгаанд хамрагдсан хүмүүсийн 534 буюу 6.5 хувь нь хуурамч үнэр үнэртдэг гэсэн бөгөөд тэд ихэнхдээ тааламжгүй, анхилуун эсвэл халуун ногооны үнэр үнэртдэг гэжээ.
Судалгааны үр дүн
Судалгааны үр дүнд гэнэт хий хоосон үнэр үнэртдэг хүмүүсийн шалтгаан нь харилцан адилгүй байдаг нь тогтоогдсон бөгөөд судлаачид үүнийг тухайн хүний үнэрлэх мэдрэмж хэт хөгжсөн эсвэл үнэр илрүүлэх үүрэгтэй тархины хэсэгт ямар нэг доголдол гарсантай холбоотой гэж үзсэн байна. Гэсэн хэдий ч судалгаагаар уг үзэгдэлтэй холбогдох хэд хэдэн зүйлс тодорхой болжээ.
- Энэ үзэгдэл эмэгтэйчүүдэд түгээмэл тохиолддог боловч нас ахих тутам тэрхүү үнэрийг анзаарахгүй болдог.
- Толгойдоо ямар нэг гэмтэл авах, ам хатаж хуурайших үед түлхүү илэрдэг байна. Ялангуяа, амьдралын төвшин доогуур хүмүүст цөөнгүй тохиолддог бөгөөд тэд ямар нэг гадна орчны таагүй үнэрт өртөх үед тухайн мэдрэмж нь сэргэдэг байна.
Хамгийн түгээмэл хуурамч үнэр
Туршилтын явцад тэрхүү хуурамч үнэрийн ихэнх нь утаа юмуу галын үнэр байдаг нь тогтоогджээ. Тэгэхээр өмнө нь ямар нэг байдлаар галтай холбоотой аюулд өртөж байсан хүн тухайн нөхцөлд ойр хавьд ямар нэг гал түймэр гарсан эсвэл зүгээр л санаанд нь тэгж орж ирсэн эсэхийг ялгахад хүндрэлтэй болдог байна. Энэхүү хуурамч үнэр үнэртэх нь та бүхний бодож байгаагаас ч түгээмэл байдаг.
Уг үзэгдлийн илүү нарийн учир шалтгааныг тайлбарлахад цаашид нэлээд судалгаа хийх шаардлагатай аж. Харин судалгаанд хамрагдах хүмүүс нь параназаль синусын үрэвсэл, тархины хавдар эсвэл Паркинсоны хууч өвчтэй байж болохгүйг анхаарах ёстой юм байна.
