1
Нүүрсэн эм
Хөргөгчнийхөө эвгүй үнэрийг арилгахад танд 20 ширхэг нүүрсэн эм хэрэг болно. Нүүрсэн эмээ нухаж, нунтаг болгоод, саванд хийж бэлтгэнэ. Үүнийгээ хөргөгчин дотор байрлуулж, хонуулах бөгөөд өглөө гэхэд хөргөгчний эвгүй үнэр багассан байх болно. Та тус аргыг цааш үргэлжлүүлэн хэрэглэж, эвгүй үнэр бүрэн гүйцэт арилтал, хөргөгчин дотор байрлуулаарай. Мөн та нунтаг нүүрсэн эмээ аль болох тарааж хавтгай том саванд хийснээр, үр дүнгээ илүүтэй үзүүлнэ.
2
Хар талх
Энэ нүүрсэн хар эмтэй ижил төстэй мэт боловч үр дүн багатай. Та үүнийг хөргөгч эвгүй үнэртэй болох аюулаас урьдчилан сэргийлэх зорилгоор хэрэглэж болно. Талхыг уутнаас нь гаргаж, нимгэн хэрчээд хөргөгчинд байрлуулаарай. Энэ нь хөргөгчийг үргэлж таатай үнэртэй байхад туслах юм.
3
Хүнсний сода
Хүнсний сода нь аливааг ариутган цэвэрлэх онцгой үйлчилгээтэй болохыг хүн бүхэн мэдэх биз ээ. Харин энэ нь хөргөгчний эвгүй үнэрийг ч мөн дардаг гэдгийг та мэдэх үү? Бага зэрэг хэмжээтэй хүнсний содыг уутанд хийж, хөргөгчиндөө байрлуулаарай. Энэ нь эвгүй үнэрийг өөртөө шингээж, хөргөгчийг тань сайхан үнэртэй болгоно.
4
Эвгүй үнэр дарах бүтээгдэхүүн
Та дэлгүүр, супермаркетаас эвгүй үнэр дарах үйлчилгээтэй цацлага, үнэртүүлэгчийг худалдан авч хэрэглэж болно. Энэ нь хамгийн хялбар болоод үр дүнтэй аргуудын нэг юм. Хөргөгчин дэх бүх зүйлсээ гаргаж байгаад, сайтар цэвэрлээрэй. Дараа нь хөргөгч рүүгээ үнэр дарагчаа цацахад хангалттай юм.
5
Нимбэг
Хэрвээ хөргөгчинд тань таагүй үнэр шингэж, бусад хүнсэнд ч тэрхүү үнэрийг шингээгээд байвал нимбэгийг хэрэглээрэй. 1 ширхэг нимбэгний шүүсийг шахаж, дээр нь 10 цайны халбага архи хийж, бэлтгэнэ. Үүнийгээ хөргөгчинд байрлуулснаар, эвгүй үнэр ганц шөнийн дотор арилах аж.
Мөн та нимбэгний шүүсийг устай хольж, бэлтгэн, үүнийгээ алчууранд шингээж, хөргөгчөө цэвэрлэж болох юм.
6
Цагаан цуу
Та бүлээн ус бэлтгэж үүндээ 5-6 дусал цагаан цуу хийж хутгаарай. Харин бэлтгэсэн усаараа хөргөгчөө бүхэлд нь угааж цэвэрлэснээр, дотор муухайруулж, толгой өвтгөм хөргөгчний үнэр арилах болно. Хэрэв угаагаад ч хөргөгчний үнэр арилахгүй бол, хөвөнд цагаан цуу шингээж эсвэл стаканд цагаан цуу хийж, хөргөгчин дотор тавьж байрлуулаарай.
7
Аммиакийн уусмал
Аммиакийн уусмалыг устай хольж бэлтгээрэй. Ингэхдээ 1 литр усанд 1 халбага аммиак хийж бэлтгэнэ. Үүнийгээ алчууранд шингээж, хөргөгчөө сайтар цэвэрлэнэ. Дараа цэвэр усаар ахин нэг хөргөгчээ угаагаарай. Ингэснээр та хөргөгчний эвгүй үнэрт ахин санаагаа чилээх хэрэггүй болох юм.
