1
Нэг өлгүүрэнд хоёр алчуур өлгөдөг
Мэдээж алчуурыг өлгүүрт өлгөх нь зүйн хэрэг юм. Гэхдээ нэг өлгүүрт давхар алчуур өлгөж болохгүй гэдгийг сайтар ойлгоорой. Энэ нь алчууранд элдэв төрлийн бактерийг дамжуулж, эвгүй үнэр шингэж, ахин хэрэглэх боломжгүй болгон, амархан бохирдуулдаг ажээ.
2
Нэг алчуураа удаан хугацаанд хэрэглэдэг
Нэг гар нүүрийн алчуураа тогтмол удаан хугацаанд хэрэглэх тийм ч сайхан санаа биш юм. Мэдээж хүн бүр тусдаа гар нүүрийн алчуур хэрэглэж байх нь зөв боловч, хэт удаан хэрэглэх нь эрүүл мэндэд сөргөөр нөлөөлдөг билээ. Тухайн алчуурыг удаан хэрэглэх тусам хуримтлагдах бактери, нян нь улам ихэсч байдаг. Иймд та хэдэн сар хэрэглэсний дараа алчуураа сольж хэвшээрэй.
3
Хэт их угаалгын нунтаг ашигладаг
Хүмүүс их хэмжээний угаалгын нунтаг хийснээр тухайн алчуурыг сайтар цэвэрлэж, нян бактерийг устгалаа гэж үздэг. Гэхдээ энэ нь эсрэгээрээ таны хийж байгаа хамгийн буруу үйлдэл болж хувирдаг. Учир нь хэт их угаалгын нунтаг ашиглаж угааснаар алчуур хатуу ширүүн болохоос гадна, илүүдэл угаалгын нунтаг нь мөөгөнцөр, хөгц үүсэх гол шалтгаан болж, тэр ч бүү хэл арьсанд харшил өгөх нь ч бий.
4
Байнга угаадаггүй
Алчуур маш амархан бохирдож, хиртдэг. Цаашлаад эвгүй үнэр ханхалж, нүүрээ арчих аргагүй болдог билээ. Харин та долоо хоногт хэдэн удаа алчуураа угаадаг вэ? Хэрэв танай гэр бүлийн гишүүд олон бол, гар нүүрийн алчуураа өдөр бүр, биеийн алчуураа 3 өдөрт нэг удаа угаах ёстой гэдгийг анхаараарай. Ингэснээр та өөрийгөө болон гэр бүлийнхнээ элдэв төрлийн халдварт өвчин болон бусад аюулаас сэргийлж байгаа хэрэг юм шүү.
5
Хангалттай халуун усанд угаадаггүй
Та алчуураа халуун усанд угааж хэвшээрэй. Энэ нь алчууранд нуугдсан нян, бактерийг устгаж цэвэрлэх тустай юм.
6
Хэт их зөөлрүүлэгч ашигладаг
Энэ нь хэт их угаалгын нунтаг хийж байгаагаас ялгаагүй зүйл юм. Хүмүүс зөөлрүүлэгч хийж, алчуураа зөөлхөн сайхан үнэртэй болгоно гэж бодох боловч, үнэндээ эсрэгээрээ байдаг. Ингэснээр мөн л нян, бактери үржих таатай нөхцөл бүрддэг аж.
7
Шахаж тавьж хатаадаг
Гар нүүрийн алчуураа угаасны дараа хатаах үйл явц эхэлдэг. Харин та алчуураа хатаахдаа тус тусад нь зайтай тавьж байх хэрэгтэй. Эс бөгөөс дээр дурдсанчлан нэг нэгэндээ нян халдааж, эвгүй үнэр шингэж, ахин угаах шаардлагатай болдог билээ.
