Кристиан цөөнгүй хэдэн жилийн турш алдартай жүжигчид, тэрбумтнуудтай хамтарч ажиллаж байгаа бөгөөд тэдэнд хувийн арал, амралтын газарт нь, тэр ч бүү хэл хил дамнан очиж үйлчлэх нь бий. Тэр болгонд асрагчийг хувийн онгоц, тансаг машин болон тусгай хамгаалалтаар хангадаг ажээ.
Австралийн уугуул иргэн Кристиан энэ тухайгаа: “Би энэ ажилд ороод Европын улсууд, Энэтхэг, Америк, Багамын арлууд, Арабын Нэгдсэн Эмират гээд л олон сайхан газраар аялсан. Өмнө нь бол энэ газрууд руу зүүдэндээ л аялдаг байсан байх”
“Тэд миний бүх зардлыг дааж, намайг бүрэн хамгаалалтанд авч, замдаа ядраахгүйн тулд 5 одтой зочид буудалд хонуулдаг” хэмээн хэлжээ.
Харин түүнд тавигдах шаардлага нь найз залуу болон эрэгтэй найзгүй байх, оройн 10 цагаас хойш гэрээс гарахгүй байх ёстой гэнэ.
Өнгөрсөн жилийн төрсөн өдрөөр эзэд нь түүнийг нэг цаг гадуур гарч хүссэн зүйлээ авахыг зөвшөөрсөн гэнэ. Эзэд нь бүгд баян хүмүүс байдаг тул түүнийг дутагдаж гачигдах зүйлгүй хангалттай цалин өгдөг байна. Тэр өөрөө ч үүнээс илүү сайхан ажил өөрт нь олдохгүй байх хэмээн боддог ажээ.
Кристиан ганцаараа ийм ажилтай хүн биш юм. Ром гаралтай Паоло Диана (Paolo Diana) хэмээх 40 настай эмэгтэй бол мэргэжлийн хүүхэд асрагч, гэрийн үйлчлэгч нарын “Nanny & Butler” агентлагийн үүсгэн байгуулагч ажээ. Түүний агентлаг нь дэлхийн олон улсад салбартай бөгөөд тогтсон ажил, мэргэжилгүй олон охид бүсгүйчүүдэд ховор боломж олгодог давуу талтай.
Паоло хэлэхдээ: “Манай агентлагаас зуучлагдаж буй охид бүгд л маш их хөрөнгөтэй айлд ажилд ордог. Заримдаа тэд бүр “Энэ удаад ч бид нэгдүгээр зэрэглэлийн суудлаар нисэхгүй нь дээ, азгүй юм аа” гэлцдэг. Түүнчлэн зарим айлууд жилээс жилд өөр өөр улсад амьдардаг тул тэднийг дагаад гэрийн үйлчлэгч, хүүхэд асрагчид нь хамт явахаас өөр аргагүй. Ингэснээр тэд олон орноор аялан, нэг ёсондоо юм үзэж нүд тайлж байгаа хэрэг юм” гэжээ.
Харин цалингийн хувьд тэд долоо хоногт л гэхэд 1500 евро (3 сая гаруй төгрөг) олдог. Дээрээс нь тухайн гэр бүлүүд асрагчдаа шагнал, урамшуулал болгож ойролцоогоор 30,000 евро өгөх нь бий ажээ.
