Мөсөн манангийн дараах Будафешт

Та бүхэндээ эдгээр гайхалтай зургуудыг авсан блог хөлөгч нэгэн залуугийн тэмдэглэлийг орчуулан хүргэж байна. Блогч: "2014 оны 12 сарын 1 Даваа гаригийн үдээс хойш, би нэгэн зурагчингаас Будафешт бүхэлдээ мөсөнд хучигдаж, мөсний даралтаас болж модод унаж байгаа талаар дуудлага хүлээн авсан юм. Яг тэр үед, энэ дуудлага миний амьдралын хэзээ ч мартагдахгүй дурсамж болно гэж бодоогүй...

Би бусад зурагчидтай уулзаж хамтдаа Будафештын толгодыг зорьлоо. Бид ганцхан зүйлийг маш сайн мэдэж байлаа – хүн бүр бидэнд тийшээ явах хэрэггүй, хэтэрхий аюултай гэдгийг сануулж байсан юм.

Гэвч бид үүнийг хийсэн. Автобуснаас буугаад биднээс хэдхэн метрийн зайтай унасан моддыг бид харж байлаа. Энэ аймшигт зүйлийн дараа бид цааш гол гудамжнаас хол жижиг гудамж руу орлоо.

Тэнд тийм аюултай биш байсан ч 10-аад минутын дараа бид байшингийн дээвэр юм уу, машин дээр унаж болзошгүй аварга том модыг харсан.

Ажлаа л хийж байсан учраас айдсыг мартсан байлаа. Би хүмүүст байгалийн хүчийг харуулахыг хүссэн юм. Тиймээс надад тохиолдож болох үр дагаварын талаар бодох цаг байсангүй. Би өмнө нь хэзээ ч ийм үзэгдэл харж байгаагүй. Ингээд хүний хүчээр шийдэж чадахгүй байгалийн сонирхолтой үзэгдлийн зургийг дарснаа та бүхэнд хүргэж байна".