Тайчигч бүсгүйчүүдийн амьдрал

Дэлхийн өнцөг булан бүрийн ямар ч улс оронд шөнийн цэнгээний газар бүжиглэдэг охид, бүсгүйчүүд байдаг болов уу. Мексикийн гэрэл зурагчин Алисия Вера Сан-Францискогийн тайчигч эмэгтэйчүүдийн ажлын нэг өдрийг гэрэл зургийн хальснаа буулгасан байна.

Тэрээр өөрийн гэрэл зургийн цомгийг “Өвөрмөц бүжигчид” хэмээн нэрлэсэн аж. Учир нь тэдний өөрсдийгөө илэрхийлж буй байдал, бүжиглэж байгаа зэрэг нь бусдаас нэг л өөр байсан гэнэ. Түүний энэ төслийн хамгийн хэцүү тал нь бүжигчдийн зургийг дарах зөвшөөрөл авах байсан байжээ. Хаана ч бүжигчдийн зургийг дарах хориотой байдаг байна. Үүнээс болж хэсэг хугацаанд өөрийн ажлыг зогсоосон аж.

Ингээд хэсэг хугацааны дараа тэрээр эротик төрлийн бүжигчдийн тухай фото-эссе хийхээр шийдсэн байна. Тиймээс тэрээр Сан-Францискогийн нэгэн тайчигчдийн клубт гэрэл зурагчингаар ажилд орж өөрийн зорилгыг хэрэгжүүлж чаджээ.

Эдгээр гэрэл зургуудыг тэрээр 3 жилийн өмнө авсан байсан бөгөөд бага багаар цахим ертөнцөд нийтлэх болсон байна. Түүний зургууд цахим хуудсаар алдартай болж интернэт хэрэглэгчдийн сэтгэлд нийцсэн юм.

Гэрэл зургуудад: бүжиглэж буй байдал, хөрөг зураг, тайзан дээр гарах бэлтгэл гээд бүхий л зүйл багтсан болно. Төсөлд тайчигч бүсгүйчүүдийг бүхий л талаас нь харуулсан бөгөөд тэрээр энэ төслөө үргэлжлүүлэн хийх зорилготой байгаа гэнэ.

“Миний хамгийн дуртай зураг нь уйлж буй нэгнээ дэмжиж буй бүсгүйчүүдийн зураг байсан юм. Тэд надад итгэж гунигтай үедээ ч зураг дарахыг зөвшөөрсөн явдал юм” -гэжээ.