Алдартнуудын үнэнч нөхөрлөл

Энэ бол бид бүхний сайн мэдэх алдартнуудын үнэнч нөхөрлөлийн талаар түүх юм. Эдгээр хүмүүсийг Робин Уильямс (Robin Williams) болон Кристофер Рив (Christopher Reeve) гэдэг. Тэд нэг нэгэндээ үргэлж найзууд байх болно хэмээн залуу насандаа амлалт өгч байсан бөгөөд ийнхүү амлалтандаа хүрч чаджээ. Робин, Кристофер нар зовох, жаргахын аль алинд нь үргэлж хамт байж нэг нэгнээ дэмжсээр он цаг өнгөрөн одсон байна. Ингээд энэхүү үнэнч нөхөрлөлийн түүхийг сонирхоцгооё.

Робин Уильямс болон Кристофер Рив нар Жульярдын сургуульд сурч байхдаа анх танилцсан байна. Тэд нэг өрөөнд амьдарч байсан бөгөөд энэ үеэс тэдний нөхөрлөлийн түүх эхэлжээ.

Алдартай болохоосоо өмнө тэд нэгэн амлалтыг нэг нэгэндээ өгч байжээ. Энэ нь түрүүлж алдрын оргилд хүрсэн нэг нь андыгаа орхихгүйгээр үргэлж дэмжиж байх болно гэсэн юм.

Хэдийгээр тэд хоёулаа амжилтанд хүрсэн ч найзууд хэвээр үлдсэн юм.

Харин нэгэн азгүй тохиолдлоор Кристофер мориноос унаж, хүзүүний нугаламаа хугалчихсан бөгөөд үүнээс болоод хөгжлийн бэрхшээлтэй болсон байна. Гэсэн хэдий ч Робин найзаа хаяагүй юм.

Кристоферыг хагалгаанд бэлдэж байсан бөгөөд хагалгаанаас амьд гарах найдлага 50:50 байжээ. Энэ үед гаднаас нэгэн шар өмсгөлтэй, цэнхэр малгайтай, нүдний шил зүүсэн нэгэн хүн орж ирээд Кристоферт үзлэг хийх болно хэмээн тайлбарлажээ. Үнэн хэрэгтээ энэ бол Робин байсан юм. Тэрээр найзыгаа хагалгаанд орохоос нь өмнө сэтгэл санаагаар дэмжихийг хүсэж ийнхүү орж ирсэн байна. Морьноос унасанаас хойш бараг инээгээгүй Кристофер анх удаа энэ үед л чин сэтгэлээсээ инээсэн аж. Тэрээр хэлэхдээ, "Робин надад амьдрах эрч хүчийг өгч, бүх зүйл амжилттай болох болно гэсэн итгэлийг төрүүлсэн юм" -гэжээ.